ВМРО-ДПМНЕ: Уривањето на спомениците говори за талибанскиот менталитет на власта

АКЦИЈА
loading...

Уривањето на спомениците говори за неспособноста на СДСМ да сработат некој проект и да изградат нешто полезно за граѓаните. Уривањето на спомениците повеќе говори за талибанскиот, деструктивен менталитет на власта, отколку што помага да се прикријат срамните одлуки само дел од неправедно приведените да бидат ослободени од притвор, а да продолжи изживувањето со останатите, се вели во реакцијата на ВМРО-ДПМНЕ по отстранувањето на споменикот на Антон Јанев-Ќосето.

„Правдата не е целосна сѐ додека не бидат ослободени од затвор сите неправедно приведени патриоти. Правдата не е целосна сѐ додека не бидат укинати и срамните мерки домашен притвор. Правдата не е целосна сѐ додека не се отфрлат конструираните обвиненија.

Повеќе од три месеци патриотите се држени во крајно нехумани и нечовечки услови. Патриотите се притворени без да биде исполнет ниту еден услов за таква мерка.

Тие ниту сториле терористички акт, ниту може да повторат нешто што не сториле. Тие ниту избегале, ниту имаат намера да избегаат од земјава, затоа што немаат причина и затоа што нивната љубов кон Македонија е бескрајна. Тие ниту имале, ниту имаат причина да влијаат на фабрикуваната и неоснована истрага.

За пет дена истекува и третиот месец како се во притвор патриотите, а судот дури сега ги повикува за да одлучи по нивните жалби за второто триесетдневно продолжување на притворот. Ова е класична тортура и газење на основните човекови права. Ова е неправда.

Обвиненијата за тероризам треба да бидат отфрлени во целост и конечно да се прекине оваа фарса што ја спроведуваат правосудните органи. Дурловски, Илиевски, Јованоски, Дамовски, Чавков, Божиновска, Мукоски, Тарчуловски, Николовски, Пешевска не се терористи. Тие се жртви на прогон од сегашната власт. Во нивниот случај притворот најдрско се злоупотребува.

Судот мора да разбере дека мерката притвор не смее да се користи како начин на заплашување, замолчување, казна и тортура само затоа што постојат луѓе кои отворено се спротиставуваат на антидржавните политики на Зоран Заев и СДСМ“, соопшти ВМРО-ДПМНЕ.

loading...